ორგანიზაცია ,,მწვანე სექტორი“, ,,საქართველოს ღია საზოგადოების ფონდის“ მხარდაჭერით, ახორციელებს პროექტს: ,,სამთო ექსპრესი“. რომლის მიზანია ზემო აჭარის საზაფხულო იალაღებზე მცხოვრები მემთეური ოჯახების საზოგადოებრივი მხარდაჭერის გაძლიერება და მათი სოციალურ-ეკონომიკური მდგომარეობის გაუმჯობესება. აღნიშნული პროექტის ფარგლებში, ზემო აჭარის 6 სამთო იალაღზე (თეთრობი, დიდი იაილა, ბეშუმი, გომისმთა, ზორტიყელი, ჩირუხი) განხორციელდა მემთეური ოჯახების მხარდაჭერის კომპლექსური პროგრამა, რომელიც მოიცავდა, სამედიცინო, ვეტერინარულ და საგანმანათლებლო მიმართულებებს:

• ღია პლატფორმაზე - გასაშლელ ტენტში მოეწყო საკონსულტაციო-საინფორმაციო სივრცე. თერაპევტმა (მირანდა ბასილაძე) მემთეურებს გაუწია პირველადი სამედიცინო დახმარება, მისცა რჩევები ჯანმრთელობის დაცვის საკითხებზე, ყურადღება გამახვილდა COVID-19-თან დაკავშირებულ საფრთხეებზე, ვირუსის გავრცელების პრევენციის გზებზე, ავადობის სიმპტომებზე და რეაგირების მექანიზმებზე;

• ვეტერინარმა (უჩა უმეთაძე) მემთეურებს გააცნო პირუტყვის მოვლისა და დაავადებათა რისკების შემცირების შესახებ არსებული ინფორმაცია, დეტალურად განუმარტა პროფილაქტიკური და ვეტსანიტარული ღონისძიებების გატარების, სამკურნალო საშუალებებისა და პრეპარატების გამოყენების წესები და სტანდარტები, კონსულტაციებში ჩართული გახლდათ ვეტერინარიის სფეროს ექსპერტები - მიხეილ ჭიჭაყუა და დავით ბოსტაშვილი (კომპანია ,,როქი“);

• სამოქალაქო განათლების ტრენერებმა (ლადო აფხაზავა, მალხაზ ჭკადუა) იალაღებზე მოსწავლეებისათვის, ინტერაქტიულ რეჟიმში, პრაქტიკული სავარჯიშოებისა და როლური თამაშების გამოყენებით, ჩაატარეს სემინარები სამოქალაქო განათლების აქტუალურ საკითხებზე, ისაუბრენ წიგნიერების როლსა და მნიშვნელობაზე, გამართეს წამახალისებელი ვიქტორინები;

• აღნიშნულ აქტივობებთან ერთად, მემთეურებს გადაეცათ სასაჩუქრე პაკეტი, რომელმაც მოიცვა სამედიცინო და ჰიგიენური საშუალებები, ვეტერინარული აფთიაქი და საბავშვო მხატვრული ლიტერატურა. საბოლოო ჯამში, მოცემულ მხარდაჭერის პროგრამით ისარგებლა 700 - მდე მემთეურმა.